不用上學嗎？

昨晚，和媽媽分享了一些見南韓示威者的感受。

媽媽甚有感觸，說：「係咁啦！真係慘！國家都唔理你，你總可以點啊？真係陰公！你知唔知帶頭的旗手係一位12歲的小朋友啊？」

「吓？我唔知喎！」我很詑異。不是參加者都是農民嗎？不是說南韓農民平均年齡是60歲嗎？而按這幾天的新聞/網上流傳的相片，印象中示威的主角都是男人。

「係啊！係個只有12歲的小朋友，第一日示威報紙都有講過下佢。今日又講啦！」媽媽繼續介紹。

「12歲？唔駛返學啊？做乜來示威啊？」我的反應很直接。12歲，還是六年級的小朋友呢！世貿關他甚麼事？

「佢父母唔得閒來嘛！宜家農忙喎！行唔開，咁佢咪代表佢父母來o羅！唉！」媽媽嘆了口氣。

「佢唔返學都得？」職業病發，腦海沒法拼出孩子走上街頭，揮旗帶領示威的畫面。

「唔知啊！我諗係啦！唉！佢地咁慘，無啖好食，讀唔讀一陣書，有乜所謂啊！世貿咁樣搞落去，第時佢冇錢讀上去，都唔知啦！無陰公！」話筒裏，傳來無限悲涼。

三跪一叩，已令我心情有點沉重。知道當中原來還有孩子，這比甚麼都更觸動我。孩子應該在學校，在家裏，在遊樂場，但他卻在街頭。孩子應該在學習，在遊戲，在玩樂，但他卻在示威。無法想像父母送別他時，心情是何等的沉重。